Sud-huquq sohasi faxriylariga hurmat-ehtirom ko‘rsatib, ularning tajribasini yosh sudyalarga yetkazish maqsadida O‘zbekiston Sudyalari assotsiatsiyasi va Xorazm viloyat sudi hamkorligida «Uch avlod uchrashuvi» ma’naviy-ma’rifiy tadbiri o‘tkazildi. Videokonfrensaloqa tizim orqali o‘tgan tadbirda O‘zbekiston Sudyalari assotsiatsiyasi raisi Ubaydulla Mingboev, sud faxriylari, Xorazm viloyat sudlari sudya va xodimlari hamda yuridik texnikum o‘quvchilari ishtirok etishdi.
 
Tadbir kun tartibidan o‘rin olgan masalalar “O‘zbekiston-2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturining mazmun mohiyatini keng ommaga yetkazish hamda sud-huquq sohasidagi islohotlar – inson huquqlarini ta’minlashning muhim omili ekanligini, texnikum o‘quvchilariga Odil sudlov – inson manfaatlari himoyasining garoviligini tushuntirish va “Kasbi-korim adolat bo‘ldi” kitobining mazmuni bilan ishtirokchilarni tanishtirish bo‘ldi. Mazkur mavzular yuzasidan viloyat sudining sudyalari ma’ruza qilib, qatnashchilarga to‘liq tushuntirishlar berishdi.
 
Uch avlod vakillarini bir joyga jamlagan tadbirda  Respublikada, viloyatda, uzoq yillar sudyalik lavozimlarida ishlagan, bugun keksalik gashtini surayotgan mehnat faxriylari o‘z tajribasi hamda amaliyotida uchragan ziddiyatli vaziyatlarni ishtirokchilar bilan o‘rtoqlashdi. Ustozlar tomonidan sudyalik kasbining maqomi mas’uliyat, halollik, fidoyilik, doimiy malaka oshirish va odob-axloq singari mezonlar bilan uzviy bog‘liq ekanligini ta’kidlandi.
 
O‘zbekiston Sudyalar assotsiatsiyasi raisi U.Mingboev bu kabi uchrashuvlarining ahamiyati, ustoz-shogirdlik munosabatlarining hayotda va xususan, sud tizimida juda muhimligini misollar bilan tushuntirib berdi. Shuningdek, sudning o‘tmishi va bugungi kuni, sud tizimi bosib o‘tgan mashaqqatli va suronli davrlar haqida so‘z yuritdi.
 
Qayd etildiki, sudya nafaqat sud jarayonida, balki hamma joyda yuksak ma’naviyatli shaxs ekanini namoyon qilishi shart.
 
Uchrashuvda sud faxriylari, sudyalar va o‘quvchi yoshlar ham so‘zga chiqib, kun tartibidagi mavzular yuzasidan o‘z fikr-mulohazalarini bildirishdi.
 
Tadbirning kulminatsion nuqtasi Shoxruh Akbarov tomonidan sud faxriysi U.Mingboevning hayoti va faoliyati haqida real voqealar asosida yozilgan “Kasbi-korim adolat bo‘ldi” nomli kitobning taqdimoti bo‘ldi. Viloyat sudi raisi Sh.Kamolov kitob va unda keltirilgan voqealar sudya va bo‘lajak huquqshunoslar uchun juda katta maktab bo‘la olishiga alohida to‘xtaldi.
 
Ikki kitobdan iborat bo‘lgan tarixiy-hujjatli roman Surxondaryo viloyatining chekka bir qishlog‘i Tagitobada tug‘ilib o‘sgan, hayot qiyinchiliklarini sabr-toqat, iroda bilan yengib o‘z taqdirini o‘z qo‘li bilan yarata olgan, mehnat faoliyatini ichki ishlar tizimidan boshlab, sud tizimida esa viloyat sudining sudyaligidan boshlab O‘zbekiston Respublikasi Oliy sudining raisi, Sudyalar Oliy kengashining raisi lavozimida ishlash nasib etgan O‘zbekistonda xizmat ko‘rsatgan yurist, Oliy malaka darajali sudya Ubaydulla Mingboevning hayoti va samarali faoliyatiga bag‘ishlanadi.
 
Uch avlod uchrashuvi tadbirda ishtirok etgan barcha uchun yaxshigina “ma’naviy ozuqa” bo‘ldi. Ayniqsa, yosh sudyalar va o‘quvchilar to‘g‘ri yo‘ldan adashmaslik, kasbga fidoyilik, ma’naviy barkamollik bo‘yicha katta avlod vakillarining hayotiy tavsiyalarini olishdi.